La Beauté, pour la Reyne Ie sçay bien que les Immortels Recognoissent touts mon Empire, Et que rien ça bas ne respire Qui ne me doive des autels: Mais ie quite ceste puissace Et me range à l'obeïssance D'un Iuste & d'un aimable Roy, De qui l'ame en vertus feconde Reçoit autant de voeux de moy Que i'en reçois de tout le monde.

Nymphe Premiere pour Madame Un nombre d'Amants qui m'adorent Sont venus les larmes aux yeux, Me protester devant les Dieux Que mille flammes les devorent: Rien que moy ne les peut ravir, Ils sont heureux de me servir, Ne me nomment que leur Deesse, Ne redoubtent que mon courroux, Cest hommage, ie le confesse, O Beauté, m'est rendu pour vous.

Nymphe Seconde pour Madame de Vendosme On parle de ce Roy des Thraces, Dont les hommes ont fait un Dieu, Et l'Univers n'a point de lieu Où son nom n'ai laissé de traces. Malgré la force & le malheur Il fit passage à sa valeur Par les terres les plus estranges: Mais laissant tout ce qu'il acquit Il porta toutes ses loüanges A la Beauté qui le vainquit.

Nymphe Troisiesme pour Madame de Verneuil La Beauté, tant elle est hardie, Iadis à Mars osa ravir Un Heros, qu'elle fit servir P la Princesse de Lydie. On blasma ceste lascheté, Et son nom en fut porté Moins precieux à la memoire; Mais ceux qui sont vaincus par nous Au lieu d'en obscurcir leur gloire, En sont lus estimés de tous.

Nymphe Quatriesme pour Mademoiselle de Vendosme Une Beauté n'a rien d'amer, Et quoy que son mespris afflige, Celuy-là qu'elle désoblige Ne se peut tenir de l'aimer. Ses rigeurs sont pleines s'amorce, Sans elle l'amour est sans force, Elle a des coups si glorieux, Et iette une si douce flame Que les plus redoubtez des Dieux Luy voudroient exposer leur ame.

Nymphe Cinquiesme pour Madame de Luysnes Déesse, vous vous arrestez D'une si douce servitude Qu'on ne peut sans ingratitude Vous demander nos libertez. Nos ames sont trop honorées, Elles ont des chaisnes dorées, Un ioug d'inestimable prix. Aussi les courages plus braves, Et les plus incomodez esprits Sont esclaves de vos esclaves.

Nymphe Sixiesme pour la Comtesse de Rochefort Amour, alors que son flambeau Fit naistre les cruelles flames Par qui les grandeurs des Pergames Furent mises dans le tombeau, Eut veu sa gloire diffamée, Et la Grece tant renommée Eut abusé de sa valeur, Et fort mal employé sa peine, Si la cause de ce mal-heur N'eust été la beauté d'Helene.

Numphe Septiesme pour Mademoiselle de Courtenay Les Forçats qui d'un ioug de fer Endurent les pesantes trames, Et sur l'onde à force de rames Trainent leur vie & leur enfer: En rompant ce qui les attache Sorent avant finir leur tasche: Mais quand nous lions un amant, Quoy qu'il veuille éviter sa peine, D'un de nos cheveux seulement Il ne sçauroit rompre la cheine.

Nymphe Huitiesme pour Madame de Cleinchant Il n'est point dame si farouche De qui l'object d'une Beauté N'adoucisse la cruauté PAr un seul reagrd qui la touche. Ceste Nymphe Fille du Ciel Aux plus mutins oste le fiel, Des plus cruels tire des larmes. Pour elle les meilleurs guerriers Donneroient à force de charmes Pour un Mirte mille Lauriers.

Nymphe Neuviesme pour Mademoiselle Ozoria Eux dont le coeur froid comme glace Est ennemy du feu d'Amour, Comme indigne de ceste Cour Ne trouvent point icy de place. Que s'ils en pouvoient approcher, Eussent-ils l'ame de rocher, En voyant des beautez si rares Ils ne seroient plus endurcis, Et ie croy que les plus barbares Deviendroient lse plus adoucis.

Nymphe Dixiesme pour Mademoiselle de Mendosse Une Beauté lors qu'elle blesse Avec ses traits touiours vainqueurs, Ne laisse iamais dans les coeurs Aucun pointe de tristesse. Les plus sages se vont offrir Aux peines qu'elle fait souffrir, Tout le monde luy fait hommage, Et l'Amour seroit à blasmer S'il ne cherissoit son image, Qui l'aime & qui le fait aimer.

Nymphe Unziesme pour Mademoiselle Bouchavane Bien que ta torche soit brulée, Que ton carquois n'ait plus de traits, Que tes graces soient sans attraits, Amour, entre en ceste assemblée: Vien-toy soubmettre à la mercy D'un bel oeil qu'on adore icy: Et quand tu le verras reluire Par un miracle nompareil, Sans mensonge tu pourras dire Qu'un aveugle voit le Soleil.